ترانہ کلیہ فاطمہ الزہراء للبنات نیپال

             ترانہ کلیہ فاطمہ الزہراء للبنات
                   بھنگہیا روپندیہی نیپال
کلیة فاطمة الزہراء ہے گل کدہ قرآن و سنن
تہذیب و ثقافت کا منبع تعلیم و ہنر کا یہ مخزن
یہ حامئی دیں اور داعی حق میراث سلف کا گہوارہ
ہے نور حرا پیغام صفا کردار نبی کا نظارہ
بدعت کی شب دیجور میں ہے یہ چرخ کا روشن سیارہ
تہذیب کہن کا گرویدہ مغرب کی ثقافت کا دشمن

کلیة فاطمة الزہراء ہے گل کدہ قرآن و سنن
تہذیب و ثقافت کا منبع تعلیم و ہنر کا یہ مخزن

اس بزم کی سعئی پیہم سے آثار شریعت زندہ ہیں
مہتاب حرم کی کرنوں سے گھر بار یہاں تابندہ ہیں
اس تیشئہ حق کی ٹھوکر سے بدعات یہاں شرمندہ ہیں
توحید شریعت سنت کے جاری ہیں یہاں پہ گنگ و جمن

کلیة فاطمة الزہراء ہے گل کدہ قرآن و سنن
تہذیب و ثقافت کا منبع تعلیم و ہنر کا یہ مخزن

اس دور کی دختر ملت ہیں اسلاف سے نسبت ہے ہم کو
ہم مریم و زینب کی رہ پر میمونہ سے الفت ہے ہم کو
سلمی و سمیہ ریحانہ اسماء سے اخوت ہے ہم کو
ہیں بلبل طیبہ شیریں زباں پیارا ہے محمد کا گلشن

کلیة فاطمة الزہراء ہے گل کدہ قرآن و سنن
تہذیب و ثقافت کا منبع تعلیم و ہنر کا یہ مخزن

مرکز ہے ہمارا دین نبی توحید نشانی ہے اپنی
قرآن ہمارا مشعل ہے  کیا راہ سہانی ہے اپنی
رہبر ہیں ہمارے شاہ امم تہذیب پرانی ہے اپنی
لگتا ہے سدا ہر رستے سے محبوب ہمیں سنت کا چلن

کلیة فاطمة الزہراء ہے گل کدہ قرآن و سنن
تہذیب و ثقافت کا منبع تعلیم و ہنر کا یہ مخزن

تعلیم عطا کر دے یارب ہم دیں کا طریقہ اپنائیں
ہم راہ صداقت پر چل کر اسلام کا شیوہ اپنائیں
مانند خدیجہ کبری ہم اسلاف کا اسوہ اپنائیں
کردار صحابہ اپنائیں ہو پیش نظر احمد کا سخن

کلیة فاطمة الزہراء ہے گل کدہ قرآن و سنن
تہذیب و ثقافت کا منبع تعلیم و ہنر کا یہ مخزن

اصغر کی دعا ہے ہم سب کو تسکین ملے ایمان ملے
ضو بار مہ توحید رہے عفت کا یہاں سامان ملے
گفتار نبی تعلیم ملے تفسیر بھرا قرآن ملے
توفیق ہمیں دے اے مولی ہر آن ترا ہو ذکر حسن

کلیة  فاطمة الزہراء ہے گل کدہ قرآن و سنن
تہذیب و ثقافت کا منبع تعلیم و ہنر کا یہ مخزن